2Ch 15 | NdeIBE | STEP | Umoya kaNkulunkulu wehlela phezu kuka-Azariya indodana ka-Obhedi.

2 Chronicles 15

Imvuselelo Ka-Asa

1 Umoya kaNkulunkulu wehlela phezu kuka-Azariya indodana ka-Obhedi.

2 Waphuma ukuba ayehlangabezana lo-Asa wasesithi kuye, “Lalela kimi, Asa labo bonke abakoJuda labakoBhenjamini. UJehova ulawe nxa wena ukuye. Nxa umfuna, uzamfumana, kodwa nxa umlahla uzakulahla. 3 Okwesikhathi eside abako-Israyeli babengelaye uNkulunkulu weqiniso, bengelaye umphristi wokufundisa njalo bengelawo umthetho. 4 Kodwa osizini lwabo baphendukela kuJehova uNkulunkulu ka-Israyeli, bamfuna bamfumana. 5 Ngalezozinsuku, ngenxa yokuxokozela okukhulu kwezizwe, kwakungelula ukuhambahamba.

6 Kwakulencithakalo isizwe sichithwa ngesinye, umuzi uchithwa ngomunye, ngoba uNkulunkulu wabehlisela zonke izinhlobonhlobo zosizi.

7 Kodwa wena, qina ungayekethisi, ngoba owakho umsebenzi uzakuba lomvuzo.”

8 U-Asa wathi ewezwa lamazwi lesiphrofetho sika-Azariya indodana ka-Obhedi umphrofethi, waqina waba lesibindi. Wasusa zonke izithombe ezinengisayo kulo lonke ilizwe lakoJuda lelakoBhenjamini lasemizini ayeyithumbile emaqaqeni ako-Efrayimi. Wavuselela i-alithare likaJehova elaliphambi komkoto wethempeli likaJehova.

9 Wasebuthanisa bonke abakoJuda labakoBhenjamini kanye labantu ababevela ko-Efrayimi, lakoManase kanye lakoSimeyoni ababehlezi phakathi kwabo, ngoba babebanengi kakhulu abako-Israyeli ababethe ngokubona ukuthi uJehova uNkulunkulu wayelaye bathutha beza ngakuye.

10 Babuthana eJerusalema ngenyanga yesithathu ngomnyaka wetshumi lanhlanu wokubusa kuka-Asa. 11 Ngalesosikhathi benza imihlatshelo kuJehova eyezinkomo ezingamakhulu ayisikhombisa lezimvu kanye lezimbuzi eziyizinkulungwane eziyisikhombisa kulezo ababezithumbe babuya lazo. 12 Benza isivumelwano sokuba bamdinge uJehova uNkulunkulu waboyise, ngezinhliziyo zabo ezipheleleyo langomoya. 13 Bonke ababengayi kumdinga uJehova, uNkulunkulu ka-Israyeli, babefanele babulawe, loba bebancinyane loba bebakhulu, loba kungowesilisa kumbe owesifazana. 14 Benza isifungo kuJehova ngokuvungama, bememeza njalo bevuthela lamacilongo lezimpondo. 15 AbakoJuda bathokoza bonke ngesifungo ngoba babesenze ngenhliziyo yabo yonke. Bamdinga uJehova ngokulangatha, wabavumela ukumfumana. Ngakho uJehova wabanika ukuthula nxa zonke.

16 INkosi u-Asa yasusa ugogo wayo uMahakha esikhundleni sokuba yindlovukazi ngoba wayenze insika yokukhonzela unkulunkulukazi u-Ashera oyisinengiso. U-Asa wayidiliza insika, wayiqumaquma wayitshisela eSigodini saseKhidroni. 17 Lanxa engasusanga izindawo zokukhonzela ko-Israyeli, u-Asa wayezinikele kuJehova ngenhliziyo yakhe yonke empilweni yakhe yonke. 18 Wangenisa ethempelini likaNkulunkulu isiliva legolide lezinto lezo yena kanye loyise ababezahlukanisele uJehova.

19 Akusazange kube lempi kwaze kwaba ngumnyaka wamatshumi amathathu lanhlanu wokubusa kuka-Asa.